မင်းရဲကျော်စွာ
လှံ ဓား ဝိုး ဝင်း၊ စစ်မြေခင်းတွင်
ဆင်မြင်းရံလျက် ထိုနေ့က။
နေပြည်ရှိရာ၊ မျှော်ရှုကာလျှင်
အနာသည်းလည်း၊ ခံသည်းညည်းနှင့်
မညည်းမညူ၊ ကိုယ်ကိုထူလျက်
ယာမူ ရွှေဓား၊ ဝဲ ရွှေလွှားနှင့်
အားပြုမှီတင်း နေသည့်ခိုက်။
ငါရှိပေလျက်၊ ပြည်ကိုဝက်၍
နန်းထက်မင်းမူ၊ ငါ၏တူ-ဟု
နိုင်သူမင်းက ဖိတ်ခေါ်သည်။
ဘကြီးတော်ယဲ့၊ ကျေးဇူးငဲ့လည်း
တိုင်းပြည်မဲ့သူ မဟုတ်ပါ-တဲ့။
သမီးတော်နှင့်၊ ဥကင်ဖွင့်၍
အသင့်မင်းမူ၊ ငါ၏တူ-ဟု
နိုင်သူမင်းက ဖိတ်ခေါ်သည်။
ဘကြီးတော်ယဲ့၊ ကျေးဇူးငဲ့လည်း
မယားမဲ့သူ မဟုတ်ပါ-တဲ့။
သားတော်ရင်နှစ်၊ သားရင်းစစ်သို့
ထီးလှစ်မင်းမူ၊ ငါ၏တူ-ဟု
နိုင်သူမင်းက ဖိတ်ခေါ်သည်။
ဘကြီးတော်ယဲ့၊ ကျေးဇူးငဲ့လည်း
ဖခင်မဲ့သူ မဟုတ်ပါ-တဲ့။
ငါ၏ထံမှောက်၊ ဆေးဝါးသောက်၍
ထမြောက်ခါမူ၊ ပြန်လေ တူ-ဟု
နိုင်သူမင်းက ဖိတ်ခေါ်သည်။
ဘကြီးတော်ယဲ့၊ ကျေးဇူးငဲ့လည်း
သေခြင်းမဲ့သူ မဟုတ်ပါ-တဲ့။
လှံ ဓား ကိုလှဲ၊ စစ်မြေထဲ၌
မင်းရဲကျော်စွာ၊ စေတီသာကို
ရာဇာဓိရာဇ၊ ရေစက်ချလျက်
အမျှယူလေ၊ သုံးကြိမ်ဝေသည်
မြိုင်ခြေဒလ တောကြီးတန်း။
မင်းသုဝဏ်
(၁၉၆၈ ဇွန်၊ ငွေတာရီ)
No comments:
Post a Comment